Aswi ohne di...

und glei nö a sea Liedl und nö a sea Video. Nöemo donkschie in olla fo di dogiibige Ataraxia-Tour! I geh itz entla in Wintoschlouf und moch a Raschtale. Wenn mi di Viecho fan Wolde in negschtn Langis widdo schickn, donna ge...h i widdo unto di Leit - und nimm je noch dem a pou fa meina viechischn Kollegn miet.

Des secht wö selbo: wenn's live isch, isch's holt net perfekt - aswi is life holt asö isch.

I höff, des bikemp awi worm ba dei Liedlan!

Oachale fan Toule

 

 

 

 

Melodie: Do längischte Laggl af do Welt (www.thetallestmanonearth.com), "Thrown right at me"
Text: Oachale fan Toule

Aswi ohne di

Tonz la durchs Leppa, und lossdo nicht gfoll
und drah di in Winte, bolla wischplt in Moll
Di oan hom di Uung, und wio hom di Zeit
in Taifl zin Tucke tiwo gou nicht me heit

und wos hot des Spatzl nö gsung gröt doföü? ... Asöü.... Olls foget söüwisöü

Und zoag la di Zunge, bol do Zwiddo sich zoag
und loch in kuschz oh, und donna knet in in Toag
du willsch net hong, obo olls hong an dio
willsche zsessn a Wei(n)dl, ödo decht lieba a Bio?

und öbwöül du nie kriechsch, hosche an Pletza afn Knie ... jo wie?... Genau se mocht di schie

Ati kimp mo fie, di Welt wa dai Kommo
do Summo, do Winto, do Blitz und do Tondo
und i moch in Wint, und fogiß öft ati
dassi lieba ba dio bin, aswi ohne di

obo asöü aswi des olls kem isch wescht des a olls widdo gie ... jo wie?... Des sött jemand fostieh....

Gschriebm in Langis 2012, gspielt an 8. Septembo 2013 in Lana, OurFalschauer Session

Oachale fan Toule

Lonxam gong...

dou loss i enk widdo öppas hinte fon long Winto - is Pressa-Liedl. A Hymne an in Kneta Kas und af di güite Vodauung auchn. Text isch weita untn - ibosetzn müssis enk a Teldra.
Is Reächl und do meinige hobm in Septembo in Lan...a ba do Falschauer des Liedl gspielt und di Leit fan JuxMediaLab Jugendzentrum Lana hobm auginumm. Donkschie!

Lonxam gong - Oachale fan Toule & is scheinheilige Reächl

Melodie: Darrell Scott (http://www.darrellscott.com/index.php?page=music), "Long time gone"
Text: Oachale fan Toule

Lonxam gong

Do Vouto lig af do Öfnbrugge, di Schweschto hietit di Öfnbonk
heit gib's widdo Pressa zin Nochtmal, se kenn i schu fa weitn afn Gschtonk
Di Müito hoaßt mi ochn in Keldo, zi höül wa nö a Rüibmkraut
i woaß schu wi des olls ausget, bol do Kneta na in Mougn innin haut

Na binni lonxam gong, ofton Nochtmal glei, bol di Luft nö stet
lonxam gong... bol man's entla nö doheb

Reächl!

Asöü wa bessa di Stube meidn, na binni aussn an di frische Luft
i mecht koa Vogiftung leidn fa den sießn Kneta-Duft
Obo kam bin i fan Neschtlan, panzt mi's schu, und i geh i di Knie
as rumplt, pumplt, druckt und zuckt und i lossat an liebischtn la gie...

Na ischa lonxam gong... a sea Pfufale, obo gaanig holt
lonxam gong... in di güite Luft fan Wold

Reächl!

... und gong isch des na nöemo, etlan mo asöü nö
lamme in di Knie gong, druckn - und asöü wö!
Ou, des isch a Wöühlto(u)t, wenn man sich dogie lot,
und af se folott, dassis a an Ende hot....

Na binni züigikeascht ba di reidign Gamsn, weil di sebm hobm an güitn Schnops
Zirmila hon i mo bstellt, und broucht hotin a Gamse mit an Glotz
Gsund! und weck! und oamo schnaufn, na gspier i schu in easchtn Zuck
an Rumpla tüt's, di Gamsn schaugn, und mochn, und mochn, und mochn, und mochn
und mochn nö an olloleschtn Schluck

Na sanse lonxam gong - und mi in Gstonk zirugg gilot
lonxam gong - und i hon's güit fostonn

Na sanse lonxam, lonxam, lonxam gong - do Kneta und di Rüibm lossn di net hong
lonxam, lonxam, lonxam gong - zilescht isch a jedo Stüil nö gong

Gschriebm in Shelta, Ende Dezembo 2010

Oachale fan Toule

Wos i doföü vogessn hon, isch, in di Südstoutn-Hiedlan zi donkn... di sebm hobm di Idee eigentlich ohgigrottn (http://www.dixiechicks.com/)

Und nö öppas: Unto Pressa vostet man di Presskneidlan, dei wos indon Klopfe nö mitn berüchtigtn Kneta-Kas gimocht weng. Di Aussoklapfla mochnse mit Gorgonzola, obo se müss man la fostieh, se passt schu a... ;-)

Güit na, bis sebm, bol di Touge widdo länga weang!

Oacha

Do Gaschtna - Oachale und Reächl

Nois Video - nois Glick. Meina Viechkollegn (is Reächl, do Quendl Tarantiggo, do Bergmouda) und i san gonz fröeh, um net zi sougn gourawi stölz, enk heit a nois Videole zi zoagn. Lott's enk gilizzn!

Dou hoppis nö a bissile is Gschichtl dohinto, obo höffwo la, dass ins do Quendl nö a "Meiking of: do Gaschtna" nouchliffoscht ;-)

Do Gaschtna

Melodie: Do Längischte Laggl af do Welt ( thetallestmanonearth.com ), „The Gardener“
Tegscht, Gitarre, Xong: Oachale fan Toule
Geige, Aura, Untomoulung: is scheinheilige Reächl
Bildo ihgfoucht und gschniitn fos Video: Quendl Tarantiggo
Ton ihgfoucht und ougimischt: do Bergmouda (Studio KEN)
Lokeischn: is olte Schlössa in Aahng


Do Gaschtna

I bin an liebischtn in Gaschtl - a wenn i mi öft amo taisch
mio san di Pflanzlan eifoch lieba - i bin a Viech und iß koa Fleisch
aswi do Wielischa sei Löch wüilt schint i mi ou – jou – olle Jou
bis i na gou bin, nimma dou bin, bis i na gou nicht me giwou – und hoamwaschz fou

Des isch mei Feld, dou bin i Hiischte, des isch mei Schicksol, isch mei Freid
zin Glick leb i net in do Wiischte – in Summo fezz’z, in Winto schneib’s
aswi do Eäripfl in Ocko bin i a eines Tages reif
I bin fogänglich und unendlich – zigleich! – a wenn i’s nö net gonz bigreif – isch a la gleich

Und in mein Gaschtl tü i tonzn, se isch güit fo di Fruchtborkeit
weil Pflonzn tin söffl geang tonzn, grött weil se wissen, dassis schneib
und bol di Sunne donna nouchgib, und i mi lonxam niedoleig
zi meina Bliemlan in mein Gaschtl – na lochwo na und reidn bleid, und reidn bleid…

Geä, setzt mo Bliemlan af mei Groubstott und lott mi eifoch awi sei
dei Rüi wos i doföü nie gihob hon – se honni itz und mio isch fei
und wenndis mi frog, wos zi tie wa – na soug i: Leb! und sat net feig.
und tit dogschoffn und awi lochn – weil zilescht nicht ondos bleib
Fa enkon Leib
Fa enkon Leid
Fa enkon Leib

Oachale fan Toule, gschriebm in do Nocht fan 24. afn 25. Dezembo 2012

Wio hobm des Video an 26. Juli 2013 nö "live" auginumm und gidrahnt, oan Tog föü is Gitafle in do Stube ougilegg wöschtn isch. Mittloweile gib’s des Haus asöü gou nimma. Dou wescht itz mit di oltn Stoane a nois Haisl augstellt, fo a noia Gschichte und a nois Lebm.
Wio hobm fosüicht, in Klong und di Schwingung fan oltn Schlössa nöemo ihzifouchn in den Videolan. Wenndis ginau lissnt, donna schwing dou a Haufe Gschichte miet in den gonz bsundon Stibile – di koltn riewign Wintonachte, do worme Loam, di gröeßn und kloan Sörgn und womeiglich nö is Rötz und Wosso-Gilachto fa olta Zeitn.
Des isch a Liedl af di Vogänglichkeit auchn, afs Kem, afs Bliehn, afs Vobliehn, und afs Gie – und widdo kem.
Zi donkn isch widdo amo in Längischtn Laggl af do Welt ( thetallestmanonearth.com ), dea wos mio is Gitarre-Spiel noi beibroucht hot und dea wos höffentlich a a Freide mit inson Videolan hot.
In Reächl donk i fos Geige-Spiel, fos Bild mit Forbe ausmoul, fo jedn Stroach und fo di blöeße Existenz – du bisch a Gschenk.
In Video-Produzentn müss i mea donkn aswi dou Plotz isch, do Qendl Tarantiggo hot net la gfilmp und gschniitn (nachteweis), do se isch eifoch dou bol’s braucht – olbm mit oan Auge öffe und mit den Hausfostond, den wos man in Umgong mitn Oacha braucht.
Jo, do Bergmouda isch in Tog doföü escht Vouto wöschtn, und hot die Öxntour dechto mietgimocht und mit seina sensibl Öeng di Musig ihgfoucht, und vorollem in Klong fa den Raum, dea wos asöü niema me hezistell get. Donkschie fos iboroul zigleich sei und af di Melodie, wos wo in dea Welt zi fouchn vosüichn..
Zi donkn isch do Feiwei in Ahng, dei wos ins aswi olbm schnell und unkomplizioscht weitagihölfn hot. An bsundon Donk in di Leit, dei wos ban Schlössa gileb hobm und weitalebm. In di boadn Mando und itz in Tom und seido Sippe.
Wio tin olla la af den aubaun, wos ins di oan ziruggilott hobm – und asöü wescht’s eäwig weita gie.
Ba den Liedl mecht i nö donkn fon Wenne, fo di Doris und fon schneidigschtn Gaschtna, den wos i in mein Lebm kenngileang hon: in Papa.
Wio sechn ins!

Oachale fan Toule

Noia Tour, nois Glick!

Di Ataraxia-Tour 2013: asöü aswi's ausschaug kim i widdo awi ummanondo, atiemo aloane, atiemo mit do Bande

Mocht's güit doweile, i frei mi afn oan und ondon Hoagascht mit enk!

Oachale fan Toule

...dea Wind & Ataraxia...

Hoi Leit!

Na müssi la longsam widdo aussa fa mein Neschtlan... . Zsescht loss i enk a Gschichtl ibon Wind hinte, und wegn do Ataraxia-Tour reidwo donna.
Do Text zin Liedlan isch af youtube ba di Details, und di Donksougungen san a sebm zi finn.

I bin zwou nö net gonz woch und müss mi nöewi ausstreckn, obo i frei mi schu af di kloane obo feine Tour in do sunnign Jouhreshälfte. Dea Wind treib mi widdo in olla Himmlsrichtungen: fan zinntoschtn Kason bis Innichn, fan Gardamei bis ins Pseira, i soug's na schu, kuschz föü i autauch.
Deswegn: i moch koa Plakate, meg la af facebook ödo twitter ödo blogspot awi schaugn: sebm sechtis, wou do Oacha tonzt!

I frei mi a schu widdo mit Olpmzoo hoire awi umzilossn...